BILBOKO UDALAK ABIAN JARRIKO DU BARIKUAN “BILBOKO KORALA GERTUTIK” PROGRAMAREN LAUGARREN EDIZIOA, KORAL ELKARTEAREN MUSIKA URIKO ZENBAIT BARRUTITARA ERAMATEKO
Sei emanaldi izango dira, honako talde hauekin: Umeen Abesbatza, Euskeria Abesbatza, Bilboko Korala, gurasoek osatutako Alegro Abesbatza eta Jesús Guridi orkestrako ikasleak, gitarren orkestra eta organo eta kantu gelak.
Kontzertu guztiak auzoetako elizetan egingo dira, bariku eta zapatuetan, arratsaldez eta sarrera librea izango da. (Bilbon 2019ko apirilaren 29an).
Bilboko Udalak abian jarriko du barikuan, maiatzak 3, “Bilboko Korala Gertutik” programaren laugarren edizioa. Sei kontzertu eskainiko dira Uriko hainbat barrutitan, Bilboko Koral Elkartearen eta bere taldeen eskutik, zeinek 300 lagun baino gehiago biltzen baitituzte, musika-tresna espezialitateetako eta kantu ikasleak barne. Udal ekimenak Bilboko Koral Elkartearen eta BM Supermerkatuen babesa du.
“Bilboko Korala Gertutik” programaren helburua da musika koralerako zaletasuna jende guztiaren artean sustatzea eta Bilboko Koral Elkartea osatzen duten taldeen eta bertako ikasleen lana erakustea. Barikuan hasiko da, 19:30etan, Abandoko Done Bikendi elizan Bilboko Koralak eskainiko duen kontzertuarekin.
Hurrengo emanaldia maiatzaren 4an izango da, zapatua, 18:30etan, Zorrotzako Mirarien Dominaren Gure Amaren parrokiako elizan, eta Jesus Guridi orkestraren eskutik etorriko da, Txaber Fernandez zuzendariaren gidaritzapean, Bilboko Koral Elkarteko kantu ikasleen laguntzarekin, Marta Ubietak gidatuak. Emanaldi horretan nabarmentzekoak dira Haydnen Sol nagusiko kontzertuetan parte hartuko duten biolin eta txelo bakarlariak eta sopranoentzako eta tenoreentzako aria sonatuak, hala nola “La Traviata”, “O Sole Mio”, “Funiculi funiculá” edo “Ave Maria”.
Hurrengo asteburuan, maiatzaren 10 eta 11n, “Bilboko Korala Gertutik” Begoñako Basilikara eta Deustuko San Felicisimo elizara helduko da. Horrela bada, maiatzaren 10ean, barikua, Euskaria Abesbatzako gazteek Begoñako Andra Mari elizan kantatuko dute, Urko Sangronizek gidaturik, eta Miriam Cepedak koordinatutako organo gelako ikasleekin batera.
Biharamunean, ordu berean, Deustuko San Felicisimo elizan, Eskolan Kantari proiektuko ikasleek egindako lana erakutsiko da. Bilboko Koral Elkarteak eskolaz kanpoko curriculumean musikarik ez zeukaten zazpi ikastetxeetara eraman duen gizarte- eta hezkuntza-proiektua da Eskolan Kantari.
Ikasturteko azken txanpan murgildurik, maiatzaren 18an, zapatua, 18:00etan, Otxarkoagako Justo eta Pastor santuen elizan arituko dira Gitarren orkestrako ikasleak eta gurasoek osatutako Alegro Abesbatza, Leonardo Alonsoren eta Emma Lópezen gidaritzapean, hurrenez hurren.
Azkenik, ekainaren 8an, zapatua, 20:00etan, Iralabarriko San Antonio elizan, azken 25 urtean Jose Luis Ormazabalek zuzendu duen Umeen Abesbatza gaur egun osatzen duten 70 ahots zurik amaiera emango diote jaialdiari abesbatzaren kanta arrakastatsuenekin, abesbatza sortu zeneko XX. urteurrena ospatzeko kontzertuei hasiera ematearekin batera.
