Bilboko Koral Elkartearen eta EuroBasqueren arteko akordioa Europako kultura musikaren bitartez sustatzeko
Bilbon, 2024ko abenduaren 16an – Bilboko Koral Elkarteak eta EuroBasque – Europako Mugimenduaren Euskal Kontseiluak hiru urterako lankidetza-hitzarmena izenpetu dute urtero, Piano Week ekitaldiaren esparruan “Europaren aldeko Kontzertua” egiteko.
Piano Week Bilboko Koral Elkarteak sustatutako ekimena da, non artista gonbidatuek, eta ikastetxeko ikasleen talentu emergenteak piano-kontzertuak eskaintzen dituzten musika-aberastasun handiko kultur astean. Orain, EuroBasquek eta Bilboko Koral Elkarteak eginiko akordioari esker, “Europaren aldeko Kontzertua” ere egingo da, euskal herritarrei Europako kulturaren ondarea eta aniztasuna musikaren bitartez ezagutarazteko, toki oso enblematikoan, Bilboko Elkarte Filarmonikoan, hain zuzen ere.
Urtero eskainiko den kontzertua topagune aparta izango da musikak, hizkuntza unibertsala den aldetik, bai kultur harremanak sendotzeko bai herrien arteko ulermena eta batasuna sustatzeko. Gazteei arreta berezia jarrita, proiektuaren helburua da Europako musika-ondare aberatsa hedatzea eta balioestea, eta, era berean, belaunaldi berriei mugak gainditzen dituen elkar ulertzeko bitarteko bat ezagutzen laguntzea.
Bilboko Koral Elkarteak ekitaldiaren alderdi artistikoak koordinatuko ditu, eta EuroBasquek, berriz, zabalkundean lagunduko du, harreman instituzionalak ezar daitezen bultzatuz. Erakunde biek kulturak Europa eraikitzeko prozesuan betetzen duen zeregina balioesten dute, eta, hitzarmenaren bidez, elkarrekin jardungo dute lanean Europako musikak agerikotasun handiagoa izan dezan Euskadin.
“Europaren aldeko Kontzertua” musika-ekitaldia ez ezik, erakunde biek Europako kultur integrazioarekin duten konpromisoaren lekuko ere izango da, eta beste babesle eta laguntzaile batzuk ere gonbidatuko dituzte Bilboren bihotzean urtero Europako kultur nortasuna ospatzeko ekitaldira. .
Bilboko Koral Elkartea, 1886an sortua, erreferentziazko kultur erakundea da Euskadin, musika koralaren sustapenaren eta musika-prestakuntzaren aldeko konpromiso nabarmena duena. 200 koralista inguruk eta 400 ikaslek osatua, eta urtero 50 emanaldi baino gehiago eskainita, euskal musika-tradizioa eta errepertorio berrien aurkikuntza bultzatzen ditu.
EuroBasque Europako Mugimenduaren Euskal Kontseilua da, 1949tik Europan batasunaren eta integrazioaren balioak sendotzeko lan egiten duen irabazi-asmorik gabeko elkartea. Bere misioaren barruan, Europako kultura eta gaiak Euskadin zabaltzea dago, Europako eskualde eta nazioek elkar uler dezaten eta haien arteko lankidetza sustatuz.
